[حفيدة المصطفى]

**** اهلا بكم اخوتي واحبائي ****

((اليوم موضوع عبارة عن نموذجين لزوجين في معاملتهم لزوجاتهم))

<<<< نموذج للزوج الاول >>>>>

يرجع الزوج من عمله يلاقي زوجته بافضل الثياب وأحسن حال

والمنظر الي بيخوت طبعا ويبدأ عمنا غزل فيها ...

الزوج ::كيفك حبيبتي ؛ وحشتيني يا عمري (ويمكن توصل الحكاية لاكتر من

كلام )
المهم:ايش طابختلنا ست الستات اليوم ؛ ريحة الاكل من جمالها معبية البيت ..

** تحط السفرة ويبدأو اكل بالهنا والعافية **


الزوج::ايش الجمال دا كلو ؛ تسلم ايدك يا قلبي ؛ وطبعا يأكلها بيده الكريمة..

** طيب بعد الاكل **

الزوج ::يلا يا روحي جهزي نفسك نخرج نتفسح شوية ؛ ويطلعو بحفظ الله يروحو

عل بحر يستممتعو بمنظر الغروب والأمواج ؛ وانسو بعد كدة الدلع اخر موديل..

بعد المشوار ما يخلص يرجعوا على البيت ؛ طبعا الزوجة المثالية هادي تكون

محضرة جو رومانسي غير شكل ينسيه حياته



<<<<< النموذج الثاني >>>>>

الزوج يرجع من الشغل قرفان حياته وبيضارب دبان وجهه ؛؛ ومراته المسكينة

تكون مجهزة الاكل والبيت بيلمع ولابسة اخر شياكة ..

الزوج::السلام عليكم ؛ وتبدأ الحرب ؟؟

الزوج::ايش الريحة المقرفة دي اللي معبكة البيت قومي خلصينا وحطي الاكل بدي

اتسمم وانام كم ساعة..

تحط الزوجة الاكل ويبدأو ياكلو ؛؛ طبعا لا حس ولا خبر ولا صوت غير صوت

الصحون والملاعق ؛ والملاحظات من حضرة جنابه على اكلها...

**بعد الأكل يطفح كاسة الشاي وينسطل بعدها وينخمد وهي ياقلبي عليها

زيها زي رجل أي طاولة عندها في البيت ...

**يصحى المضروب على عينه من النوم علي التلفزيون والاخبار وسمت

البدن و ناسي انو في انسانة آدمية عايشة معاه في البيت ؛؛؛ ولااااا وفوق كدة يبدأ

يبحلق ويعمق الرؤية في المذيعات ... وبعدين يالله انا خارج اسهر مع أصحابي ...

ويجي الموكوس على عينه آخر الليل بريحته اللي كلها سجاير وشيش ويا ريتو ماجا ؛؛ تروح الزوجة تلبس وتتشيك وتتعطر عله يحس على دمه ويقلها

ايش الريحة الحلوة دي أو يقوم يستحم وتتفاجأ المسكينة انو العطر كتم على نفسه

وما عجبته ريحته !! سبحان الله عاد من ريحتك العدلة

طبعا هي تتنكد وتروح تنام وهي بتدعي عليه ودمعتها على خدها

بعد عدة مرات من معاملة الزوج لزوجته بهادي الطريقة

تروح لبيت أهلها مكسورة الخاطر مع استمرار المشاكل بينهم والمشكلة انو هي

اللي بتنلام


(((سؤالي :: ايش اللي يخلي الزوج في النموذج الاول يتصرف غير تصرف

الزوج في النموذج الثاني مع العلم بأن الزوجة مثالية في كلتا الحالتين؟؟؟؟)))