|
#1
28-03-2009, 08:23 PM
|
|||||
|
|||||
زاوية بالبلدي الفصيح
 بالبلدي الفصيح مقال في جريدة عكاظ يكتبه ويبدعه لنا اسبوعيا الاستاذ فتحي حلواني فهو يتناول شتى لمواضيع والقضايا الاجتماعية بقالب بلدي فكاهي مميز ... متى نفرح بالمطرة ؟ كنت زمان وأنا صغير في حارتي (الصحيفة) كانت لمن تنزل المطرة أشوف جيراننا من الرجاجيل والشباب يسووا ممرات من التراب عشان موية المطرة تتدحدر منها وتصب في حفر البيارات عشان تكون بعيدة من بيوت الجيران. لكن دحين في الزمن ده اللي نحنا فيه تصب المطرة عندنا خمس دقايق بس يشفطوها في خمسة أيام وفي بلاد غيرنا تصب المطرة عندهم خمسة أيام يشفطوها في خمس دقايق عشان كده لما تجي المطرة نقول يارب حوالينا ولا علينا... بالله عليكم مين ما يحب المطرة؟ لكن المسؤولين حقون الامانة واللي ماسكين مشاريع تصريف موية المطرة ومشاريع الشوارع كرهونا في المطرة لانه جدة موعودة دايما مع المطرة انه تتبهدل شوارعها وتتكسر وتنهار وتشوف هبوطات الشوارع اللي تعجبك لانه المقاولين اللي مسكتهم الأمانه هادي المشاريع شغلهم أي كلام (من بره الله الله ومن جوه يعلم الله) والأمانه ( يالبو ) قلبها عليهم على طول تدفعلهم مستحقاتهم من غير ما تتأكد وتشوف وتتابع كيف كان شغل هادول المقاولين ويقولك يللا (طبطب وليس يطلع كويس) والله شي يحزن هدا اللي بنشوفه في شوارع جدة لما تنزل المطرة الشوارع تتعبى مويات والسيارات تغرق في الحفر اللي موجودة في الشوارع مافي شارع اللي مدهمل ومتكسر وحالته بالبلا تمشي في الشارع كأنك راقص راب كل جسمك يتخضخض وما تحس الا ودماغك صاقع في سقف السياره وشوف عاد بعد كده التصاريح الرنانة اللي بنشوفها على صفحات الجرايد واللي بيقولوا فيها حنطالب المقاولين بغرامات على شغلهم التعبان والتاني يقولك مواد ( الدك ) هيه السبب في 99 % من الهبوطات اللي بتصير في الشوارع لانه المقاولين بيستخدموا مواد دك أي كلام (ياعيني) طيب فين المتابعه فين الحرص على هادي المشاريع صدقوني لو الأرض تعرف تتكلم كانت قالت خلاص ياناس ارحموني كل يوم تكسير وتحفير وترقيع هدا غير المصايب اللي حتجينا بعد المطرة لأنه موية المطرة بعد كده حتصير مستنقعات في الشوارع والأحياء والحارات طالما مافي شفط وحيجينا بسببها حمى الضنك والناموس ما حيقصر حيمص في دمنا اليين تصير الناموسة قد الجاموسة وربنا يستر من سد بحيرة المسك لا يروح ينفجر من كتر ارتفاع المويه المعفنة اللي فيه ونرووح في خرخر ... ياناس ياهووه سنين وسنين وجدة تشتكي من موية المطرة متى حتنحل مشاكل المطرة ومشاكل الشوارع تعبنا ونحنا نتكلم ونهرج مليارات الريالات بتندفع عشان هادي المشاريع والحال زي ماهووه (( تيتي تيتي زي ما رحتي زي ما جيتي )) ياناس ياهووه نبغى جواب لسؤالنا متى نفرح بموية المطرة ؟ وعيشووا كتيييير تشوفوا كتييييير ودحين اسيبكم واشوفكم الاسبوع الجي وانتو بصحة وسلامة  التعديل الأخير تم بواسطة حفيدة المصطفى ; 28-03-2009 الساعة 08:26 PM. 
|
|
#3
28-03-2009, 08:57 PM
|
|||||
|
|||||
الله المستعان ايش نعمل
الله يجيب المطر يا ستي وخلي الارض تغرق على خفيف 
__________________
يارب عسى اللى جآي خير وآلي مضى خيرة الصلاةُ عـــلى رســـول الله شمس لاتغيـــــبُ حاشا يضام من استجار بها وحاشا أن يخيبُ فإن دعوت الله في أمر عصيٍّ أو عصيـــــــبِ فابدأ دعائك واختتمه بالصلاةِ على الحبيــــبِ دروس الروحه على الرابط التالي
|
|
#4
28-03-2009, 09:33 PM
|
||||
|
||||
|
يامطره صبي صبي على قريعة بنت أختي وبنت رئيس البلديه خخخخخخخخخ
|
|
#5
28-03-2009, 11:43 PM
|
|||||
|
|||||
|
اقتباس:
|
|
#6
28-03-2009, 11:56 PM
|
|||||
|
|||||
|
اقتباس:
 شرفتي ونورتي وآنستي لك تحياتي 
|
|
#7
29-03-2009, 12:02 AM
|
|||||
|
|||||
|
اقتباس:
شكرا على توجدك مع تحياتي
|
|
#8
05-04-2009, 03:42 PM
|
|||||
|
|||||
|
عبايات آخر زمن ولا أوله من آخره ياكترها الأسواق اللي في وسط البلد عندك سوق العلوي وسوق باب مكة وشارع قابل وسوق باب شريف وسوق الكندرة كل اللي تبغيه موجود عندهم ... دحين انت ايش اللي حارق رزك وزعلان كل الحريم بيدخلوا هادي المولات وانت هالكني بأسواقك المعتقة والقديمة دي أسواق حالتها بالبلا والبلا لاحقها  .. ضربت يدي كف بكف وقلت أمري وخيرتي لله .. هيا تعالي ندخل من دي البوابه وربنا يستر لانروح نضيع في المول ده ومانعرف من أي بوابة دخلنا وأنا عارف برضوا انو ماحرجع البيت إلا وركبي تطقطق وح احتاج بعد كده أجيب المزيتة حق المكاين عشان أرش على مفاصلي ورجولي كمان حتورم وتبقبق من كتر اللفلفة والدوران في المول ده لكن ايش أقول حريم تعجبهم الزبرقة وكتر الأنوار اللي تبهرهم والشئ اللي ينباع في أسواق وسط البلد بـ 100 تلاقيه في المول ده بـ 1000 يللا  أهل العقول في راحه (وكل مين في سوقو يبيع خروقو) ... المهم وأنا ماشي جنب ام فتو  الا مالاقي إلا وكوعها خابطني في جنبي واسمعها تقول (عسى عينك تنعمي يا بعيد) حرام عليكي ياحرمه كتمتيني هوه ايش في ؟ من ساعة ما دخلنا المول وانت عيونك مبحلقة في الحريم  , ياحرمة حرام عليكي أنا عيوني مو في الحريم أنا عيوني في الفضائح والشئ المقزز والمقرف اللي لابسينو بعض الحريم ايش لابسين الحريم لابسين عبايات حسب الموضة . هادي فوضه مو موضة هادي عبايات هادي، العباية اللي أعرفها بتكون للستر والحشمة لكن هادي اسمها قلة حياء ومسخرة قال عبايات قال كأنها فساتين سهرة مطرزة ومشكشكة بالألوان والصور وعليها كتابات مخجلة وصور في الظهر وسلاسل على الخصر وفي منها محزقة ومخصرة تبين تقاطيع الجسم وفي منها كأنها جلابيات ومنها على شكل مشلح هادا غير انه في بعض البنات بالمرة بايعينها بيكتبو الاسم ورقم الجوال والايميل خلف ظهر العباية بنفس لون وتطريز العباية لا والمصيبة أنهم ماشيين يتقصعوا فيها في المول بطولوا وعرضوا  ولاعندهم فكرة لا عيب ولا حياء وهادا كله من تحت راس هادي الفضائحيات العربيه اللي بتجيبلنا مصممات الأزياء التافهات اللي من جماعة (وئف تا ائلك) اللي ماوراهم إلا خراب عقول بعض الحريم والبنات لكن السؤال اللي ابغالو جواب فين أهلهم عنهم فين الأب وفين الزوج وفين الأم وفين الأخ لما يشوف بنته والا بنتها والا اخته والا زوجته تخرج السوق بالشكل ا لفاضح ده فين الغيرة فين الرجولة والا خلاص شالو برقع الحياء يا آباء يا أمهات يا أخوان يا أزواج بناتكم وزوجاتكم أمانة في رقبتكم وكل راع مسؤول عن رعيته ..المهم سحبت أم فتو من يدها وجينا خارجين وسألت رجل الأمن اللي كان واقف بيراقب حركة المول  .. لو سمحت كيف أقدر اروح لبوابة رقم 3 لانه السياره واقفة هناك رد عليا وقال العباية بالمرة حلوة!!!؟ طالعت في الراجل وقلت أحد جاب سيرة العباية أخدت بعضي ومشيت وقلت في نفسي من كتر ماشاف أشكال وألوان العبايات انسطل وحسبي الله ونعم الوكيل وعيشوا كتييييير تشوفوا كتييييير يقول الله عز وجل في كتابة الكريم «يا أيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين وكان الله غفورا رحيما» لكن مين يفهم؟ التعديل الأخير تم بواسطة حفيدة المصطفى ; 05-04-2009 الساعة 03:49 PM.
|
|
#9
05-04-2009, 10:14 PM
|
|||||
|
|||||
|
ايش في ليش زعلانه ههههههههه
__________________
يارب عسى اللى جآي خير وآلي مضى خيرة الصلاةُ عـــلى رســـول الله شمس لاتغيـــــبُ حاشا يضام من استجار بها وحاشا أن يخيبُ فإن دعوت الله في أمر عصيٍّ أو عصيـــــــبِ فابدأ دعائك واختتمه بالصلاةِ على الحبيــــبِ دروس الروحه على الرابط التالي
|
|
#10
18-08-2009, 10:17 PM
|
|||||
|
|||||
|
انتظرونا في رمضان  قبل لا أدخل في هرجة اليوم أحب أقول لكل القراء مبروك عليكم الشهر ورمضان كريم وكل سنة وانتو بخير وصحة وسلامة وأسأل الله سبحانه وتعالى أنه يتقبل مننا ومنكم الصيام والقيام ... ودحين ياحبايب تعالو ندخل في هرجتنا حق اليوم: ايشبك زعلان وشايل الدنيا على راسك؟!  لا زعلان ولا حاجة.. بس رمضان على الأبواب والدنيا حتنقلب في البيوت قلب .. كل بيت يبغى مقاضي وعازات والشوارع حتنزحم من كتر السيارات الرايحة والجية على الأسواق كأنه بهارات محرم تختلف عن بهارات رمضان.  بس هادي عادة الناس في رمضان يبو فتو. بلا عادة بلا كلام فاضي.. ايش المانع انه الواحد يشتري الشيء اللي يبغاه وبعقل من غير تبذير وإسراف لكن انتو يا حريم من يوم ما يقرب رمضان إلا وتجيبو لنا الجنان  كأنكم ما تاكلوا ولا تشربوا إلا في رمضان، فيه عوايل ما هي لاقية لا تاكل ولا تشرب، الحرمة منكم تاخذ لستة المقاضي وزوجها وراها ويجي نازل على السوق والا على المراكز التجارية المنتشرة في البلد زي الدود واللي دعاياتها في كل مكان وكله ضحك على الدقوووون. وهات يا لفلفة ودوران في المركز وما يرتاحوا إلا لما يخرجو منه بكم عربية وما يدري أخينا انه نص هادي المقاضي حتترمي في الزبالة، حرااام حراام هادا الإسراف اللي بنشوفه ونسمع عنه كل سنة في رمضان.. وكله كوووم وهادا اللي حتسمعيه كمان كوووم تاني... في بعض الناس الله يهديهم لما تكووون عنده عزومة فطور تشوف السفرة مليانة من كل نووع من أنواع الأكل والشرب ومن كتر الصحووون المرصوصة ما تعرف شكل ولوووون السفرة وبعدين ما يتاكل من هادا الهيلمان كله إلا حبة سمبوسة وكم حبة تمر وكم لقمة فول وملعقة شربة وملعقة سقودانه «حاجة كده زي المهلبية»... ياهوووووه يا ناس عمره ما كان رمضان للأكل و الشرب ... رمضان للعبادة والصلاة وقراءة القرآن. لا ... أزيدك كمان من يوم ما يجي رمضان تشوفي القنوات الفضائية للأسف تتسابق عشان تعرض مسلسلاتها وأفلامها ومسابقاتها والجرايد مليانة من كثر إعلاناتها على هادي المسلسلات والبرامج التافهة والهابطة وما تشوف إلا الإعلانات في كل القنوات وكل ممثل وممثلة يجي يقولك (انتظرونا في رمضان).. أنا أبغى أفهم هادولا الممثلين والممثلات والمخرجين والمنتجين ما يعروفوا ياخذوا إجازة على الأقل في رمضان ويرحمونا شوية من مسلسلاتهم وبرامجهم اللي ما لها لا طعم ولا معنى ولا قيمة عشان كده بقول يا أصحاب هادي القنوات ارحمونا شوية من هادي البلاوي و الأفلام والمسلسلات اللي ما وراها إلا فساد روحانية هدا الشهر الفضيل... وبعدين تعالي قوليلي ايش هادي الورقة اللي في يدك لا تكون ورقة المقاضي. ارتبكت الحرمه وقالتلي: هاااااه....  لا... لا .. لا يا سيدي لا ورقة مقاضي ولا حاجة.. هادي ورقة كنت بالعب أنا وفتو لعبة حيوان.. إنسان ..جماد.. ورمضان كريم يبو فتو..... وعيشوا كتييييير تشوفوا كتييييير. التعديل الأخير تم بواسطة حفيدة المصطفى ; 18-08-2009 الساعة 10:26 PM.
|
 |
| الذين يشاهدون محتوى الموضوع الآن : 1 ( الأعضاء 0 والزوار 1) | |
|
|
